فينيش وولده خشبه..كوميديا ملهاش حل

فينيش وولده خشبه

فينش للسعاده الأبديه

عبده فينش : أنت ياواد من ساعة ماجيت المحل وأنت ناحسه ..وشك فقرى زى أللى خلِفّتك
خشبه : يابه دى أرزاق وربك يبعت

> لأ ..بقى دى أقدام

> ما هو لو أنت يابه تسمع كلامى وتسيبنى أعملك دعايه حلوة للمحل ونعمل شوية ديكورات ..الزباين حتهل والعملية تبشبش وأحنا كمان داخلين على شهر رمضان والشغل بيكتر فيه قوى ..أأقولك ياحاج تعال نعملوا أوكازيون ونقدم هدايا على كل عمليه

> هدايا زى أيه يافالح

> فانوس رمضان ..لفة قمر الدين ..كيلو مكسرات..مجموعة سديهات كيف تتخلص من حياتك.. حاجة زى كده

>ياواد أنت أتخبلت فى دماغك فيه حد يبقى عنده نفس ياخد فانوس أو ياميش أو قمر الدين.. وحياخدوا من مين.. من حانوتى يا أبن الفقريه

> أنا بقولك أفكارى.. وبعدين أيه اليافطه أللى أنت معلقها دى فوق الدكان
( حانوتى العائلات ) يعنى مفيش حد بيموت ألا من العائلات ..حتى أى زبون ييجى يشوفها يفتكر أن أحنا أسعارنا غاليه قوى ..أنا من رأىِ نختار أسم مودرن يمشى مع الناس كلها.. نسميه حانوتى الليل الطويل أو الشمس الذهبيه ولا أقولك نسميه حانوتى السعاده الأبديه

> حلوة السعاده الأبديه طلعت فيها واد فقيق.. موافق عليها

> ونلغى كمان كلمة حانوتى دى ونخليها فينش للسعاده الأبديه بس عايزينها يافطه أيه تلعلط وتولع وتطفى توماتيكى ..ونغير فى مدخل المحل نشيل الخشب والعده فى المخزن مانخلهاش ظاهرة قدام الناس والعربية بتاعة نقل الموتى السوداء مانخلهاش تقف قدام المحل عايزين نحسن سمعتنا يابه وياريت نرشها دوكو أخضر.. أصفر.. فوشيا وبلاش لونها المقبض ده الناس لما بتشوفنى أو بتشوفك بتبعد وشها بعيد عننا

> عادى عمركش شوفت ياواد ياخشبه أن حد أخد حانوتى بالحضن

> نفسى يابه تسيبنى أنفذ أللى فى دماغى وأتفرج بقى على الزباين حتهل علينا أزاى العايشين قبل الميتين ..عايز أعمل ورق دعاية مكتوب فيه الأسعار والتخفيضات والخدمات ونمر تليفونات المحل والموبايل بتاعى وبتاعك يبقى فى كل بيت وفى جيب كل الناس ..قاعد لى بس على باب المحل وفاتح أغنية الموت علينا حق وأيها الراقدون تحت الثرى وكل شويه تجعر وتقول : وحدوووه ..ياعم الحاجات دى راحت من أيام القصرى وزينات صدقى أحنا دلوقتى فى زمن هيفاء ونانسى

> مين ياواد هيفاء ونانسى دول

> ياعم فينش دى جتت بيضا زى القشطه بتنور فى الضلمه وارد لبنان مافيش زيها فى مصر وما دفناش زيها قبل كده

> وأيه يعنى كله عارف طريقه.. مصيرهم يشرفوا حيروحوا فين يعنى
.. سيبك ياواد ياخشبه أنا فى دماغى برضه أن أروق المحل قبل رمضان بس أنا حاطط عينى على حتتين هنا فى الشارع أنما ولاد الأيه كل مانقول حنشيل ونخلص
يقوموا ولاد الأبالسه زى العفاريت وصحتهم تبقى أحسن من الأول

> قصدك يابه على عوض أفندى والوليه فطومه أم الواد سيد الخرمان

> طب ما أنت ناصح أهه وعندك نظر وبتعرف فى الحتت المستويه

> أنسى يابه ..عوض أفندى فرحه النهارده حيتجوز بنت من دور أحفاده

> حلو يبقى كده قررب يشرف والجواز حيكّمل عليه

> يابه فيه ناس صحتها بتيجى على الجواز ..أما الوليه فطومه أم سيد الخرمان لسه راجعه من أمريكا من أسبوع كانت عند بنتها بتزورها قعدت عندها 6 أشهر ماتعرفش الأمريكان عملوا فيها أيه ؟ تعال أتفرج عليها بعد ماكانوا بيسندوها وهى ماشيه دلوقتى بتقزح السلالم قزح ولا أجدعها بنت فى عز شبابها

> قوم ياض سديت نفسى بأخبارك أللى زى وشك مش بقولك أنت فقرى

> حيلك يا عم الفينش أنا بقى مجهزلك مفاجأة حتخلصك من النحس أللى ماسك فى المحل ده ..سمعت عن واحد أسمه شحيبر الفالق

> الله يخرب بيتك وبيته فى يوم واحد أيه أللى عرفك بيه ده عينه تفلق الحجر

> أهو ده أللى عايزينه ..نقعده هنا على الكرسى ده وتشاور له على أنت عايزه

وماعليه غير أنه يخبطه العين أللى هيه يجيبهولك الأرض وأشتغل ياعم فينش ولاحق بقى على الزباين
> فكره كويسه أتفقت معاه ياض

> أومال يابا أتفقت معاه بس حراق شويه عايز 100 جنيه على الحته أللى تقع
> ده راجل مستغل وجشع صحيح

> معلش يابه الغالى ثمنه فيه ..بس ده مش حنجيبه ألا لما نعمل الدعاية والديكورات للمحل ونرش العربيه ونلمع المسائل أيه رأيك يا أبو التفانيش

> ماشى نفذ بس ماتتوسعش قوى عشان الضرايب

> ولا يهمك ياوالدى طالما هنا أبيض ومعاك عزرائيل وشحيبرالفالق ولا يهمك من أيتها ضرايب أو نصايب ..أشطه ياعم

> أشطه يا فقرى ..وحدووووه